ՇԱՀԱՆ ԱՐԾՐՈՒՆԻ ՆԵՐԿԱՅԱՑՈՒՑ ՀԱՅ ԿԻՆ ՅՕՐԻՆՈՂՆԵՐՈՒ ՍՏԵՂԾԱԳՈՐԾՈՒԹԻՒՆՆԵՐԸ

Ապրիլ 13-ին, կազմակերպութեամբ Հայ Մշակութային Հիմնարկութեան (Արլինկթըն – Մասաչուսէց), Robbins Memorial Town Hall սրահին մէջ, ելոյթ ունեցաւ հռչակաւոր դաշնակահար Շահան Արծրունին, որ նուագեց իր վերջին խտասալիկին գործերը։
Հայ Կանանց Միջազգային Ընկերակցութեան (AIWA) հետ, գործակցաբար կազմակերպուած սյս նուագահանդէսը, Հայ Մշակութային Հիմնարկութեան «Միրաք» սենեկային երաժշտութեան տարեշրջանի առաջինն էր։
Արծրունի հետաքրքրական գաղափարը ունեցած է իգական սերունդի հայ յօրինողներու գործեր նուագել, որոնք թէ՛ հայկական եւ թէ՛ միջազգային երաժշտութեան բնագաւառէն ներս հետաքրքրութիւն ստեղծած են։
Խօսք առնելով, ան ըսաւ, թէ ութերորդ դարաշրջանէն իսկ հայ իգական երաժիշտներ՝ Սահակդուխտ եւ Խոսրովիդուխտ գործեր յօրինած էին։
Այս ելոյթին յայտագիրը կ՛ընդգրկէր գործեր՝ Լուսաբեր Հազարապետեանէն (1863-1855, ծանօթ Լիւսի անունով), Գոհարիկ Ղազարոսեանէն (1907–1967, պոլսահայ՝ Սկիւտարի շրջանէն), Գայանէ Չեպոթարեանէն (1918–1998), Սիրվարդ Գարամանուկէն (1912–2008, պոլսահայ՝ Սկիւտարի շրջանէն), Սիրվարդ Գույումճեանէն (1944-2020), եթովպիահայ), Գեղուհի Չիչեանէն (1929, Երեւան), Ալիսիա Թերզեանէն (1934, արժանթինահայ) եւ Մարի Գույումճեանէն (1983, Լիբանանահայ)։ Աւարտին, ան հմայեց ներկաները, նուագելով Խաչատուրեանի «թոքաթա»-ն։

Բնիկ Պոլսահայ, սակայն երկար տարիներէ ի վեր Նիւ Եորք հաստատուած, 81-ամեայ Արծրունի լոյս ընծայած է 24 ձայնապնակ։