Երեքշաբթի, Փետրուար 25-ին, Սուրբ Ղեւոնդեանց տօնին առիթով տեղի ունեցաւ հոգեւորականներու համագումար Տակլըսթընի (Նիւ Եորք) Սուրբ Սարգիս եկեղեցւոյ մէջ։
Համախմբումի բացումը կատարուեցաւ Տէրունական Աղօթքով, որմէ ետք տեղի ունեցաւ դիւանի ընտրութիւն, յանձինս Արժպ. Տ. Պետրոս Ա. Քհն. Շիթիլեանի (ատենապետ)՝ Սուրբ Գրիգոր Լուսաւորիչ (Ինտիըն Օրչըրտ, Մասաչուսէց) եկեղեցւոյ հոգեւոր հովիւ, եւ Արժպ. Տ. Սամուէլ Քհն. Աճէմեանի (ատենադպիր)՝ Ամենայն Սրբոց (Կլենվիւ, Իլինոյ) եկեղեցւոյ հոգեւոր հովիւ։ Խօսք առնելով, Արժպ. Տ. Նարեկ Ա. Քհնյ. Թրթռեան՝ Սուրբ Սարգիս եկեղեցւոյ հոգեւոր հովիւ, բարի գալուստ մաղթեց իր հոգեւոր եղբայրներուն, յայտնելով, թէ այս հանդիպումը օգտաշատ կ՚ըլլայ ո՛չ միայն հոգեւորականներուն, այլ արդիւնքը կը տարածուի եկեղեցիներէն ներս։ Այնուհետեւ, Ա․Մ․Ն․ Արեւելեան Թեմի բարեջան Առաջնորդ՝ Գերշ. Տ. Անուշաւան Արքեպիսկոպոս Դանիէլեան, ողջունեց բոլոր եկեղեցականները, գոհունակութիւն յայտնեց եւ գնահատեց անոնց անձնուէր ծառայութիւնը, յոյս յայտնելով, թէ համագործակցութեան ոգիով մեր գաղութները առաւել եւս կ՚ամրանան եւ կը բարգաւաճին, միաժամանակ օժանդակութեան հասնելով Հայրենիքի եւ Միջին Արեւելքի մեր եղբայրներուն եւ քոյրերուն։
Տիրպորնի (Միշիկըն) Սուրբ Սարգիս եկեղեցւոյ հոգեւոր հովիւ Արժպ. Տ. Հրանդ Քհն. Գէորգեան ընթերցեց 2025-ի հայրապետական հռչակագիրը աւանդութիւններու վերակենսաւորման մասին եւ լուսարձակի տակ բերաւ Վեհափառ Հօր կողմէ թելադրուած գործնական կէտերը, որոնցմով գաղութները առաւել եւս պիտի արմատաւորուին անցեալի մեր հարուստ ժառանգութեան մէջ՝ ի խնդիր ապագայի։
Ֆիլատելֆիոյ (Փէնսիլվէնիա) Սուրբ Գրիգոր Լուսաւորիչ եկեղեցւոյ հոգեւոր հովիւ Գերպ. Տ. Պօղոս Ծ. Վրդ. Թինքճեան՝ ներկայացուց առաջին դասախօսութիւնը՝ «Աւանդութեանց վերակենսաւորում» նիւթով։ Հայր Սուրբը գործնական առաջարկներ կատարեց այժմէականացնելու համար կարգ մը աւանդութիւններ, որոնք աւելի կենսունակ կը պահեն համայնքային մեր կեանքը։ Իր անձնական փորձառութենէն մեկնելով, Հայր Սուրբը յայտնեց, թէ մեր ժողովուրդը միշտ գնահատողը եղած է նման ձեռնարկներու, որոնք առաւել եւս կ՚ամրացնեն քրիստոսարմատ մեր հաւատքը։
Յայտագիրը շարունակուեցաւ երեկոյեան ժամերգութեամբ եւ Սուրբ Պատարագով։ Պատարագեց ու քարոզեց Արժպ. Տ. Սամուէլ Քհն. Աճէմեան։ Չորեքշաբթի, Փետրուար 26-ի առաւօտ համագումարը վերսկսաւ ժամերգութեամբ եւ խորհրդածութեամբ, զոր կատարեց Ռիճֆիլտի (Նիւ Ճըրզի) Սրբոց Վարդանանց եկեղեցւոյ հոգեւոր հովիւ Հոգշ. Տ. Վաչէ Վրդ. Պալըգճեան։ Երկրորդ դասախօսութիւնը ներկայացուց Բարշ. Շանթ Ա. Սրկ. Գազանճեան՝ Ազգային Առաջնորդարանի Քրիստոնէական Դաստիարակութեան բաժանմունքի վարիչ, խօսելով Նիկիոյ հանգանակին մասին։ Դասախօսը անդրադարձաւ հանգանակի աղբիւրներուն, բացատրեց հանգանակի գործածութիւնը մեր եկեղեցւոյ մէջ եւ բաղդատականը կատարեց քրիստոնէական այլ եկեղեցիներու հետ։
Գլխաւոր դասախօսութիւններէն ետք, տեղի ունեցաւ օգտաշատ զրոյց ծիսական կեանքի վերաբերեալ հարցերու շուրջ, ինչպէս նաեւ հովուական կեանքի փորձառութեանց փոխանակում։ Համագումարը վերջ գտաւ «Աշակերտ Քրիստոսի» շարականով եւ «Կիլիկիա» մաղթերգով։
