ԵՐԵՒԱՆ․- Փետրուար 26-ին, սկսաւ Հ․Յ․Դ․ 35-րդ ընդհանուր ժողովը։ Հայաստանի, Արցախի եւ Հ․Յ․Դ․ օրհներգներով բացման պաշտօնական արարողութիւնը տեղի ունեցաւ «էլիթ Փլազա» համալիրի «Մանթաշով» սրահին մէջ, մասնակցութեամբ աշխարհի շուրջ 30 երկիրներէն ժամանած ներկայացուցիչներու, ինչպէս նաեւ հայաստանեան քաղաքական շրջանակներէն՝ հրաւիրեալներու։
Հ․Յ․Դաշնակցութեան բարձրագոյն ժողովն է ընդհանուր ժողովը, որ կը քննարկէ նախընթաց ժամանակաշրջանին կուսակցութեան գործունէութիւնը, կազմակերպական ընդհանուր հարցերը, կը նախանշէ յառաջիկայ գործունէութեան համար ռազմավարական նշանակութեան ուղենիշները եւ կ՛ընտրէ Հ․Յ․Դ․ Բիւրօն, որ կուսակցութեան բարձրագոյն գործադիր մարմինն է։
Հ․Յ․Դ․ կազմակերպական կառոյցի բոլոր շրջաններու եւ միաւորներու ներկայացուցիչները կը մասնակցին այս ժողովին, որուն քննարկման առանցքային հարցերը, ի շառս այլոց, կը վերաբերին Հայաստանի անվտանգային միջավայրին, ներքին ու արտաքին մարտահրաւէրներուն, համահայկական նշանակութիւն ունեցող հարցերուն, հայութեան առջեւ թէ՛ հայրենիքի եւ թէ՛ սփիւռքի մէջ գոկյութիւն ունեցող հիմնախնդիրներուն եւ արցախահայութեան իրաւունքներու պաշտպանութեան։
Գերագոյն Մարմինի ներկայացուցիչ Իշխան Սաղաթէլեանը յայտնեց, թէ հայրենիքի պաշտպանութիւնը պէտք է դառնայ գլխաւոր ուղենիշը:
Տէրունական աղօթք կարդաց Գերաշնորհ Տէր Նաթան Արքեպիսկոպոս Յովհաննիսեանը։
Մեծի Տանն Կիլիկիոյ կաթողիկոս Արամ Ա․ ուղերձը ընթերցեց Արաբական միացեալ էմիրութիւնների, ՔուԷյթի եւ յարակից շրջաններու թեմի հոգեւոր առաջնորդ եւ կաթողիկոսի ներկայացուցիչ գերաշնորհ տէր Մեսրոպ արքեպիսկոպոս Սարգսեանը:
«Կը գտնուինք անդունդի եզրին: Համապատասխան դիրքորոշումներ պէտք է որդեգրենք` հեռու մակերեսային դատողութիւններէն», կը նշէր Արամ Ա․ կաթողիկոսը:
Հ․Յ․Դ․ Բիւրոյի ներկայացուցիչ Յակոբ Տէր Խաչատուրեան, իր կարգին յայտնեց, որ ընդհանուր ժողովը Հայաստանի մէջ կը գումարուի տագնապահար հայութեան եւ վտանգուած հայրենիքի բախտորոշ օրերուն (խօսքը կարդալ ամբողջութեամբ․- https://hairenikweekly.com/?p=63178):
35-րդ Ընդհանուր ժողովը պիտի տեւէ մինչեւ Մարտի 6:
