Թուրքիոյ մայրաքաղաք Անգարայի մէջ տեղի ունեցաւ նախագահ Էրտողանի եւ Ուքրայինայի նախագահ Վլատիմիր Զելենսքիի միջեւ հանդիպումը, որուն օրակարգին վրայ եղաւ Թուրքիոյ եւ Ուքրայինայի միջեւ համագործակցութեան ամրապնդման քայլերը։
Զելենսկի յայտարարեց, որ Էրտողանի հետ քննարկած է ռուսական գերութենէն ուքրայինացիներու ազատ արձակման, պարէնային ապահովութեան եւ Ուքրայինայի ապահովութեան երաշխիքներու հարցերը։ Ան նաեւ յայտարարեց, որ պատերազմին աւարտին ուղղուած որեւէ բանակցութիւն պէտք է ըլլայ արդար եւ պէտք է ներգրաւուին եւրոպական երկիրները , Թուրքիան եւ անգլիան։
Իր կարգին, Թուրքիոյ նախագահը շեշտեց, որ Ուքրայինայի հողային ամբողջականութիւնը եւ ինքնիշխանութիւնը անվիճելի են Անգարայի համար։
*
Թրքական ոստիկանութիւնը կալանաւորեց 282 անձեր, որոնք ենթադրաբար կապեր ունին Քիւրտ Աշխատաւորական Կուսակցութեան հետ։ Կալանաւորումները կատարուեցան՝ ամբողջ Թուրքիոյ տարածքին հետապնդումներու եւ խուզարկութիւններու իբրեւ արդիւնք։ 51 քաղաքներու մէջ, ինչպէս Պոլիս եւ Անգարա, կասկածելիներ հետապնդուեցան եւ բնակարաններու եւ վաճառատուներու մէջ խուզարկութիւններ կատարուեցան։
282 կալանաւորեալներուն դէմ ուղղուեցաւ Ք․Ա․Կ․-ի ի նպաստ քարոզարշաւ կատարելու, գումարներ փոխանցելու եւ զինուորագրեալներ արձանագրելու ծանր մեղադրանքներ, որոնց հաստատման պարագային մեղադրեալները կրնան մինչեւ 15 տարի բանտարկութեան դատապարտուիլ։
Թրքական դատական իշխանութիւնները նաեւ ձերբակալման հրամանագիրեր հրապարակեցին 60 այլ անձերու դէմ, որոնք ձախակողմեան են եւ ենթադրաբար կապեր ունին ահաբեկչական կազմակերպութիւններու հետ։Այս անձերուն շարքին են համալսարանի դասախօսներ եւ արուեստագէտներ։
*
Թուրքիոյ խորհրդարանի նախագահ Նուման Քուրթուլմուշ, Ճափոնի մայրաքաղաք Թոքիոյի մէջ հանդիպում մը ունեցաւ իր ճափոնցի պաշտօնակիցին՝ Ֆուքուշիրօ Նուքակայի հետ՝ քննարկելով երկկողմանի յարաբերութիւնները եւ կապերը։ Քուրթուլմուշ յայտնեց, որ խորհրդակցութիւններուն առանցքը դարձած են միջազգային եւ շրջանային, յատկապէս Ասիոյ խնդիրները։ Ան շեշտեց թուրքեւճափոնական յարաբերութիւններուն ամրութիւնը եւ բարեկամական կապերը։
Քուրթուլմուշի գլխաւորած խորհրդարանական պատուիրակութիւնը Թոքիօ այցելեց Անգարայի եւ Թոքիոյի միջեւ դիւանագիտական յարաբերութիւններուն հարիւր ամեակին առիթով։ Տեղին է նշել, որ Անգարա եւ Թոքիօ ռազմավարական յարաբերութիւններու բարձրացուցած են իրենց միջեւ կապերուն մակարդակը։
Թուրքիոյ խորհրդարանի նախագահը եւ անոր ընկերակցող պատուիրակութիւնը նաեւ այցելեցին Թոքիոյի մզկիթը, որ կառուցային կապեր ունի Թուրքիոյ կրօնական հարցերու վարչութեան հետ։
*
Թուրք ճարտարապետերու եւ ճարտարագէտերու խմբակ մը ժամանեց Սուրիոյ մայրաքաղաք Դամասկոս՝ միջազգային օդակայանին վերաշինութեան աշխատանքներուն իր մասնակցութիւնը բերելու համար։
Թուրքիոյ փոխադրութեան հարցերու եւ ենթակառոյցներու նախարար Ապտիւլ Քատիր Ուրալօղլու յայտնեց, որ խումբին անդամները մասնագէտներէն են Թուրքիոյ oդակայաններու պետական Վարչութեան ղեկավարած ճարտարապետերու եւ մասնագէտներու ընկերակցութեան։
Թուրքիա նաեւ Սուրիա առաքած է թռիչքներու հսկողութեան եւ վերահսկողութեան սարքեր եւ կազմածներ, որոնց օգտագործմամբ կարելի պիտի ըլլայ Դամասկոսի միջազգային օդակայանին օդային փոխադրութիւններու մարզը կանոնաւորել։
*
Գերմանիոյ մէջ գործող թրքական կազմակերպութիւններ քանի մը շաբաթ տեւած քարոզչական արշաւին ընթացքին երկրին մէջ ապրող թուրքերուն կոչեր ուղղեցին՝ խիտ շարքերով մասնակցելու 23 Փետրուարին կայանալիք խորհրդարանական ընտրութիւններուն, մտավախութիւն յայտնելով, որ ծայրայեղ աջակողմեաններ կրնան ընտրութիւններուն յաղթանակ ապահովել, ինչ որ վտանգ մը պիտի ներկայացնէ Գերմանիա ապրող թուրքերուն համար։
Ըստ գերմանական – թրքական Ընկերակցութեան, Գերմանիա ապրող աւելի քան երեք միլիոն թուրքերուն առնուազն մէկ միլիոնը գերմանահպատակ է եւ ընտրելու իրաւունք ունի։ Նախկին ընտրութիւններուն թուրքերուն միայն քսան առ հարիւրը քուէարկած է։
Գերմանիոյ Համար Ընտրանք ծայրայեղական աջակողմեան շարժումը իր քարոզարշաւին ընթացքին գործածած է հակաթուրք կարգախօսեր, թուրքերուն Թուրքիա վերադարձի օդանաւային տոմսերու լուսանկարներ օգտագործելով։
