ՆԻՒ ԵՈՐՔ․- ՍՈՒՐԲ ՍԱՐԳԻՍ ԵԿԵՂԵՑՒՈՅ ԱՆՈՒԱՆԱԿՈՉՈՒԹԵԱՆ ԱՌԹԻՒ

ՆԻՒ ԵՈՐՔ․- Կիրակի, Փետրուար 16-ին, տեղի ունեցաւ Տակլըսթընի Սուրբ Սարգիս եկեղեցւոյ անուանակոչութեան տօնը։ Յընթացս Սուրբ Պատարագի, Ա․Մ․Ն․ Արեւելեան Թեմի բարեջան Առաջնորդ՝ Գերշ. Տ. Անուշաւան Արքեպիսկոպոս Դանիէլեան, սարկաւագ ձեռնադրեց Յովիկ Մկրեանը եւ դպիր ձեռնադրեց 12 խորանի ծառայողներ. Հայկ Անաստասեան, Ալեսանտրօ Ֆելիչէ, Արիս Ճիվէլէկեան, Էնտրիւ Կորկիսեան, Էտի Հազարեան, Կրեկորի Քէշիշեան, Անթոնի Մարինօ, Ռաֆֆի Մկրեան, Արի Մկրեան, Արմէն Մկրեան, Էրիք Նալպանտեան եւ Աւետիս Թրթռեան։

Սուրբ Պատարագէն ետք, աւելի քան 150 ծխականներ հիւրասիրութեան մասնակցեցան եկեղեցւոյ սրահին մէջ։ Հանդիսավար՝ Յովիկ Սրկ. Մկրեան, խօսեցաւ հաւատքի ու եկեղեցւոյ կարեւորութեան մասին իր կեանքին մէջ։ Եկեղեցւոյ հոգեւոր հովիւ՝ Արժպ. Տ. Նարեկ Ա. Քհն. Թրթռեանի, եւ հոգաբարձութեան ատենապետուհի՝ տիկ. Անիթա Ներսէսի խօսքերէն ետք, Առաջնորդ Սրբազան Հայրը իրենց վկայագիրները յանձնեց նոր ձեռնադրեալներուն։

Ծուխի երիտասարդները ներկայացուցին ճոխ գեղարուեստական յայտագիր մը, որ կ՛ընդգրկէր շարականներու երգեցողութիւն, երգ, պար եւ նուագ։