ՖՐԵԶՆՕ.- Յունուարի կէսերէն ի վեր, Ֆրեզնոյի «Արարատ» հայկական գերեզմանատունը հրձիգի մը թիրախը դարձած է:
Հրկիզումները կատարուած են 1885-ին հիմնադրուած գերեզմաննոցի ամէնէն հին հատուածին մէջ: Կան դարպասներ եւ կամար մը, որոնք յստակօրէն կը յուշեն, թէ վայրը հայկական է: Այս նոր միջադէպը, որ պատահեցաւ Ապրիլի 24-ի՝ Հայոց Ցեղասպանութեան ոգեկոչումներու նախօրեակին՝ կասկած կը յառաջացնէ, թէ ասիկա ատելութեան ոճիր մըն է:
«Արարատ» գերեզմանատան մէջ թաղուած է Սողոմոն Թեհլիրեան։ Անոր շիրիմին մօտ, իբրեւ յիշատակ անոր՝ յուշարձան մըն զետեղուած է։ Այնտեղ կը գտնուի նաեւ Ուիլեըմ Սարոյեանի շիրիմը։
Վնասին նախահաշիւը շուրջ 25.000 տոլար է:
Ցարդ վեց յարձակումներու պատճառով այրած են 19 հին ծառեր: Յարձակումներէն վերջինը տեղի ունեցաւ Ուրբաթ, Ապրիլ 12-ի գիշերը, երբ գլխաւոր մուտքի երկայնքին հրկիզուեցան 8 ծառեր եւս:
